Losaline Veikoso Tupoumalohi
8 hrsTu’apulelulu, Ma’asi 10: Lau Folofola – Filipai 3:4b-12.
Ki’i Ama: Filipai 3:8, “’Oku ‘ikai pē ha me’a ia ‘e kākunga ki he’eku a’usia ‘a Kalaisi Sīsū ko hoku ‘Eikí. Kuó u ‘osi to’o ‘eku falalá mei he me’a kehe kotoa pē, ‘o lau pē ko e veve. Ko e me’a pē ‘oku ou fiema’u ‘e aú, ke u a’usia ‘a Kalaisi mo fakapapau’i ‘eku kau hono kakaí.”
Pou ‘Ao: Na’a ne ma’u ‘a e me’a kotoa pē na’e fiema’u ‘e ha taha fiema’u tu’unga ‘i hono taimí, ka na’e ui ia ‘e Kalaisi ke tukuange kotoa kae muimui mai. ‘Oku ‘ikai sola ha taha ia ki he founga ‘o hono ui ‘o Paulá pea ‘oku mahu’inga ke tau manatu’i ‘a hono puipuitu’á, kae lava ke toe ki’i maama ange ‘a e Ki’i Ama ‘o e ‘ahó ni. Ko e talaloto eni ‘a e mohu mo e fonu ‘i he ngaahi me’a na’e lau ko e “me’á,” ka na’a ne lau kotoa pē ia ko e “veve,” talu mei he taimi na’a ne ‘ilo’i ai ‘a Sīsū. Ko e toko fiha ‘iate kitautolu ‘i he ‘ahó ni te tau fai ‘a e lea tatau ‘oku fai ‘e Paula? Ko e lau ‘etau lotu mo ‘etau tui ‘Otua, ka ko e toko fiha ‘okú ke ‘ilo’i ‘i ho kau takangá pē ko e Siasi ‘okú ke kau ki ai te ne fai ‘a e lau ‘oku fokotu’u mai ‘e Paula ‘i he Ki’i Ama ‘o e ‘ahó ni. ‘Oku kei lahi pē ‘a e ngaahi me’a ‘oku ui ‘e Paula ko e “veve,” ‘oku tau fu’u tokanga ange ki ai ‘i he’etau feinga ke “a’usia ‘a Kalaisi Sīsū ko hotau ‘Eiki.” ‘Oku ‘ikai ke tau fu’u tokanga ke a’usia ‘a Kalaisi he ‘oku ‘ikai ko e me’a ia ‘oku mahu’inga taha kiate kitautolu. Ka kia Paula, na’e ‘ikai ha me’a ia ‘e toe mahu’inga ange ki ai ka ko ‘ene feinga ke a’usia ‘a Kalaisi. Ko ‘ene taumu’a ia ki he’ene mo’uí mo e ngāue kotoa na’a ne fai, ko ‘ene feinga ke a’usia ‘a Kalaisi. Ko e me’a ia na’a ne fakamu’omu’a ‘i he’ene me’a kotoa pē. Mahalo na ko hotau vaivai’anga pe ia ‘i he tauhi ‘Otua mo kaungā ‘api ‘oku tau faí ko ‘etau fakamu’omu’a ‘a e ngaahi me’a ‘oku ‘ikai lau ‘e Paula ko ha “me’á.” ‘Oku tau fa’a fanongo pē ‘i hono hua ‘aki ‘e he ni’ihi ka ko ‘ene fakaloloma tahá ko hono malanga’aki ‘e he ni’ihi ‘i he funga ‘o ‘enau mātu’aki tui ki ai, tokua ‘oku tokoni pē ‘a e ‘ilo’i ‘o Kalaisí, ka ‘oku ‘ikai ko e me’a mu’omu’a mo mahu’inga tahá ia. ‘I he’etau muimui’i ‘a e puipuitu’a ‘o Paula mei he’ene kei Saulá, pea ‘oku maama ‘aupito mai ‘a e fakakaukau ‘o e ‘ikai ha me’a ‘e teitei faingata’a ki he ‘Otuá. Ko e tangata eni na’a ne poletaki ke ne fakatanga’i ‘a Kalaisi mo e lotu fo’ou na’a ne fokotu’ú, kuó ne tafoki mai ‘o poupou’i ‘a e lotu na’a ne fakatanga’i ‘o lahi ange ia mo ma’olunga ange ‘i ha toe taha he kau Ako na’e taka ‘i lalo hakanga he kei ‘i Palesitaine ‘a Sīsū. Ko e hua ‘oku fa’a ngāue’aki he ‘ilo kavá, “Ko e ‘ai ia ‘e au.” Ko e liliu ‘o Paulá, “Ko e ‘ai ia ‘e Sīsū.” Ko e liliu tatau te tau ‘inasi ai ‘o kapau te tau faka’atā hotau lotó ‘i he faha’ita’u ‘o e Lenití ni ke hā’elea ‘e he ‘Eiki ko Sīsū Kalaisi pea tuku ke ne fokotu’utu’u (prioritize) ‘a ‘etau mo’uí ki he me’a ‘oku mahu’inga taha ke tau feinga ke a’usia, pea tau feinga ki ai ‘aki ‘a hotau kotoá. Fakatauange pē te tau lea fakataha mo Paula ‘i he Ki’i Ama ‘o e ‘ahó ni, pea tau talaki ‘aki ia ‘a Kalaisi ki hotau kaungā fonongá ‘i he feitu’u kotoa pē, ‘i he taimi kotoa pē. 
‘Ānau, Lotu mo e ‘Aukai: Sīsū ko koe pē ‘eku mata’ikoloa, ‘ikai ha’aku sio kehe ka ma’u koe ma’u kotoa, ‘a ‘e fēfē ha’aku lava ke ma’u koe he ma’aku, fai totonu ho huafa ka ko fonuhia pe au. ‘Emeni.
---------------------------------------------------------------------
Mei he Halanga Tapuaki.

​